Datorren larunbatean, Azaroaren 14an, Zubiaurre Igeriketa Klubeko txikienek urteko hitzordu bereziena bizitzeko aukera izango dute, San Andres saria.
Azken urteetako ohiturari jarraituz, kirola eta festa uztartuko dituzte arratsaldeko 16:00etan hasiko den igeriketa jaialdian. Zubiaurre eta Izarraitz igeriketa klubetako eta Marea Urdina taldeko igerilariek hartuko dute parte.
Adinaren arabera banatuta, LH3 eta LH4 mailetakoek 25 metro egingo dituzte igeri; LH5 eta LH6 mailetakoek eta Marea Urdinakoek, berriz, 50 metro.
Maila bakoitzeko hiru igerilari azkarrenek podiuma osatuko dute, baina lehiaren gainetik ospakizuna den egun honetan, parte-hartzaile guztiek jasoko dute opari domina eta goxoki poltsa bana.
Festaren aurretik, talde argazkiak
Igeriketa probaren aurretik, Zubiaurre I K.k talde argazkiak ateratzeko tartea hartuko du. Arratsaldea talde argazkiekin hasiko dute, beraz. 14:00etan, Zubiaurreko igerilari guztiei kiroldegira gerturatzeko deia egin zaie. Klubeko ekipazioa ez dutenek kamiseta zuria eramatea eskatu dute.
Ordutegiak:
- 14:00: Talde argazkiak.
- 15:00: Parte-hartzaileen beroketa.
- 16:00: Igeriketa probaren hasiera.
Beste urte batez, kirola, laguntasuna eta giro ona izango dira San Andres sariaren protagonistak.
Gure bidelagunak